سمعنا منذ مدة بأن هناك نية لإزالة محطة أم العيش للاقمار الصناعية… و حاولت أن أهيء نفسي لتقبل هذا الواقع الصعب , و لكن عند مشاهدتي للمنظر البشع أدناه تبدد كل ما هيأته لهذا اليوم!
لا داع لكي أطيل و أسهب في وصف مشاعري… و لا في رثاء هذه “الحدايد” ! المقطع التالي يكفي… شغله إن سمح لك قلبك !
——
تحديث:
مواضيع ذات صلة:
والله قهر !!!
ليش اليابان ما شالت المبنى الأثري اللي انفجرت فوقه القنبلة الذرية ؟ ليش ما قالوا هذا قديم و شكله متداعي و آيل للسقوط ؟؟ لأن في ناس عندهم تفكير .. و لأن في ناس تفكر و همها ديرتها .. لأن في ناس تؤمن ان اللي ماله أول .. ماله تالي ..
منو سمح للقواطي الصعايدة بتدمير أحد المعالم الأثرية في الكويت !!!؟
حسبي الله عليهم
افا والله صج!
والله انا اشوف الموضوع اكثر من عادي
يعني مكانهم بالمره ما منه فايده و كان مسبب ازمه وخطر لاي زاير
و اتوقع ازالتهم افضل من وجودهم جذي ومسسبين خطر على الناس الي يرتادون المكان الي كانو فيه
اذا الموضوع ذكرى جان خلو الديره على ما اهيه ولا ثمنو بيوت الطيت الي كانو موجودين بالكويت
:grin::roll:و صارت الكويت بكبرها متحف
أم العيش .. إسم إرتبط بذهني بالعثور على أول طبق طائر بالكويت
بالمناسبة أين تقع أم العيش؟
صج مادري شلون يفكرون هذول…يعني بداله ما ينقولهم متحف الكويت الوطني عشان العالم كله يشوف؟
!!!
خالد…
شوفه شحلاته :
معزز مكرم و تم بناء حديقة و نصب تذكاري و متحف “السلام” بجانبه
خليل..
ماينفع الندم الحين… المهم نتعلم
صالح..
الموضوع عادي لو كان اللي تهدم “مجرد” مبنى و السلام !
لو بتكلم عن تاريخ هالمبنى و قيمته التاريخية فسأحتاج لتأليف كتاب كامل و ليس رد
اذا اليوم انهدمت أم العيش و احنا نطالع فلا نزعل اذا بعد عشرين سنه تم هدم أبراج الكويت !
مساعد…
خلاص راحت عليك.. شتبي بمكانها الحين 🙂
بشار…
و الله لو الإرادة موجودة جان ينقلون… ليش لأ , مو شي مستحيل
شيء ثاني مادري يضحك ولا يبجي…
أذكر إني كتبت تعريف مختصر حق أم العيش بردي على صورة عبدالله الفودري هاذي :
http://www.flickr.com/photos/xnuzha/379306739/
أذكر إن مصدري كان موقغ الكويت الرسمي :
http://www.kuwait.kw
تفاجأت بأن الرابط اللي كنت حاطه مو شغال… السبب؟
السبب هو إن الموقع تحول من “موقع الكويت الرسمي” إلى “موقع الديوان الأميري” و طبعا مع هالتحول إختفت جميع المواضيع الأصلية… ليش؟ مادري !
يعني إدا دومين مو قادرين نحافظ عليه سنتين على بعض… ينحافظ على تاريخ وطن!؟
الموضوع كلش مو محتاج تأليف كتب 😎
مبنى الكونغرس مو ام العيش
محد درى عن هوى دار المكان اول ما باعو حديده الكل قام يتكلم
ركز في رسالة الدكتوراه احسن من توزيع الاحزان:mrgreen:
و الله يا صالح اذا كنت شايف إن معلمنا الحضاري اللي كنا نفاخر فيه و نغني عليه من و احنا يهال “ما فيها شي” إنه ينهدم على إيد “كرمبو” و جماعته بعد ما عجز صدام و جيشه عن هالشي… و شيء “أكثر من عادي” إنه ينباع”بالسكراب” على شكل حديد “خردة”… اذا شايف هالشي مو محتاج تأليف كتب بالنسبة لك فهاذي وجة نظرك و أنا أحترمها
يمكن هالشي مو من اهتماماتك.. انت حر 🙂
لكنك صدقت بشغله…
أركز على رسالة دكتوراتي أحسن 🙂
بس المشكلة إن رسالة دكتوراتي من نفس هالطقة… كلها عن الكويت و التاريخ و النهضة الثقافية اللي قمنا نبيعها… خردة
موضوع أخوي خالد الحقان
http://kuwson.blogspot.com/2009/09/blog-post.html
———————————————-
موضوع من المدون اللبناني مارك
http://www.248am.com/mark/kuwait/bye-bye-um-al-aish/
موضوع آخر لـ
^B
http://overwhelminginsanity.blogspot.com/2009/09/why.html
اولا من الخطاتسمية موقع باسم الكويت و هو اصلا موقع تابع للديوان الاميري الكويتي و القائمين عليه احدى الادارات الفنية التابعة الديوان الاميري الكويتي و ثانيا الموقع الحالي هو موقع الشيخ صباح الاحمد الجابر الصباح امير الكويت حفظه الله و من ثم يحتوي معلومات عن الكويت بصورة مختصرة و ذلك طبقا للسياسة المتبعة في المواقع الحكوميةفي العالم أجمع و في حالة الرغبة في معلومات تفصيليةعن جغرافية الكويت أو تاريخها يرجى اللجوء الى المواقع المختصة بذلك مثل موقع الدكتور عبدالله الغنيم و ليس المواقع الحكومية
بالسابق كان اسمه موقع الكويت الرسمي على ما أذكر
كيف تم تغيير الاسم و تحويل الدومين و لماذا فهذا شيء أجهله
كثير من الحكومات دول العالم المختلفة -بما في ذلك الدول العربية و الخليجية- لديها مواقع رسمية فيها معلومات شاملة عن الدولة و تاريخها و جهاتها الرسمية ، دليلها السياحي و غيرها من المعلومات التي تفيد الزائر أو الباحث
الاجتهادات الفردية هي أمر جيد ، و لكنها لا تحل محل المجهود الحكومي